José hamutuk ho DTA hahu iha 2013 hafoin kumpre ona mandatu nu’udar deputadu iha Parlamentu Nasional (2007 to'o 2012) no mós nu’udar membru Governu (2002 to'o 2007). Nia prátika foka liu ba polítika públika no esbosu lejislativu, PPP, lei ambientál, enerjia renovável, mina-rai no gás, rezolusaun disputa, investimentu doméstiku no estranjeiru, no dezenvolvimentu imobiliáriu.
Hanesan eis-Ministru, Vise-Ministru no Sekretáriu Estadu Rekursus Naturais, Minerais no Polítika Enerjétika, no Sekretariu Estadu Turismu, Investimentu no Ambiente, José mos tama iha grupu arkitetu prinsipál ba lei no regulamentu sira Timor-Leste nian kona-ba petróleu, fundu soberanu, lei sosiedade komersiál, no lei kona-ba investimentu internu no esternu. José mós halo supervizaun ba konkluzaun estudu dahuluk Governu Timor-Leste nian kona-ba enerjia renovável, hanesan enerjia solar, enerjia idroelétrika, enerjia anin no biogás, no hahú prosesu atu Timor-Leste bele sai membru ba Inisiativa Transparensia Industria Estrativa (EITI – Extractive Industries Transparency Initiative).
Husi tinan 2004 to'o 2006, José lidera ekipa Governu Timor-Leste nian iha negosiasaun ho Governu Australia kona-ba akordu fahe rekursu tasi nian iha Tasi Timor ne'ebé to’o ikus asina Tratadu kona-ba Akordu Tasi nian balun iha Tasi Timor (CMATS – Treaty Concerning Certain Maritime Arrangements in the Timor Sea). Nia mós servisu nu'udar Komisáriu ida-ne'ebé reprezenta Timor-Leste iha Área Konjunta Dezenvolvimentu Petroliferu Tasi Timor (JPDA – Timor Sea Joint Petroleum Development Area) no tuir mai nu'udar membru ida-ne'ebé reprezenta Timor-Leste iha Konsellu Ministeriál JPDA nian.
José nu'udar mós membru Konsellu Superiór Ministériu Públiku (2015 to’o 2023) no tuur iha Konsellu Konsultivu Fundu Petroliferu (2013 to'o 2018). Iha Juñu 2022, nia hetan nomeasaun nu'udar membru Komisaun Rekrutamentu no Selesaun ba Supremu Tribunal Justisa dahuluk Timor-Leste nian.
José nu'udar Asosiadu ho Chartered Institute of Arbitrators (Singapura). Tanba nia paixaun ba arbitrajen no rezolusaun alternativa ba disputa, José mós tulun Banku Dezenvolvimentu Aziatiku (ADB – Asian Development Bank) kona-ba reforma arbitrajen internasionál iha Timor-Leste (nu’udar peritu juridiku nasional), iha kontestu projetu ida-ne'ebé luan liu hodi tulun hadi'a investimentu iha rejiaun Pasifiku Sul.
José mós nafatin dedika-an no ativu iha asaun polítika ambientál nian, no foin lalais ne'e (2021-2022) elabora Dekretu-Lei kona-ba kontrolu importasaun no esportasaun substánsia ne’ebe hakiak kamada ozonu no hidrofluorokarbonetu sira tuir Protokolu Montreal kona-ba Substánsia ne’ebe Hakiak Kamada Ozonu (Montreal Protocol on Substances that Deplete the Ozone Layer). José mós fó akonsellamentu ba Sekretáriu Estadu Ambiente kona-ba Kontribuisaun Nasionál Determinadu Timor-Leste nian no lei no regulamentu sira ne’ebé relasiona ho mudansa klimátika.
Molok fila fali ba Timor-Leste, José servisu nu'udar advogadu iha Queensland, Austrália, hodi ezerse advokasia liu-liu iha área kontensiozu komersiál no imobiliáriu, direitu planeamentu no dezenvolvimentu, direitu administrativu no konstitusionál, direitu fiskál, direitu títulu nativu no direitu rekursu.
José iha Bachelor of Arts (Polítika no Istória Ekonómika) husi University of New England no Bachelor of Laws husi University of Queensland.
José hatene ko'alia lian inglés, tétum, portugés no español.
