Konferénsia Negósiu no Ekonomia Timor-Leste–Austrália ba dala-2 (TLAUCON25) hala’o iha Sentru Konvensaun Dili (CCD), hanesan inisiativa konjunta entre Governu Timor-Leste no Governu Austrália, ho apoiu husi TradeInvest Timor-Leste no Kámara Komérsiu no Indústria Timor-Leste (CCI-TL).
Konferénsia anuál ida ne’e hetan partisipasaun husi líder sira iha área negósiu no representante Governu sira atu haburas parseria ekónomiku, promove dezenvolvimentu sustentável, no hametin kooperasaun bilaterál iha setór prioridade sira.
Eventu ne'e inklui debate sira, feira komérsiál, no asinatura MoU entre CCI-TL no Kámara Komérsiu no Indústria East Kimberley atu hametin kooperasaun komérsiál rejionál.
Iha sesaun networking TLABC (Timor-Leste–Australia Business Council) nian, reprezentante husi konsellu diresaun TLABC, José Teixeira, hatete ba partisipante sira kona-ba:
Papel TLABC iha defeza ba asuntu sira ne’ebé afeta negósiu entre Timor-Leste no Austrália;
TLABC nu'udar intermediáriu ba empreza sira ne’ebé buka oportunidade bilaterál; no
Promosaun ba inisiativa setór privadu nian no fahe informasaun relevante.
Nia hanoin fila fali ba ligasaun pesoál ho fatin ne’e: iha tinan 2002, nu'udar koordenador serimónia restaurasaun independénsia Governu tranzisaun, responsavel ba Feira Komersiál Restaurasaun Independénsia, nia servisu iha okos husi Ministru-Xefi Governu Tranzisaun NU. José hala’o supervizaun ba rekonstrusaun merkadu tuan (ne’ebé agora mak Sentru Konvensaun Dili) husi AUSAID, hodi realiza Feira iha fatin ne'e. Momentu históriku ida ne’e hetan inaugurasaun husi Primeiru Ministru Austrália, John Howard, no Ministru-Xefi Timor-Leste, Mari Alkatiri, no simboliza parseria ekonómika durante tempu naruk entre nasaun rua ne’e. Legadu ne’ebé TLAUCON kontinua ohin loron, hafoin tinan 23.
Foto: TradeInvest Timor-Leste